ثقافة وفن : أحمد الفيشاوي يعترف: ناهد فريد شوقي ماتت "زعلانة مني وأنا مش ندمان"

كشف الفنان أحمد الفيشاوي عن بداياته في عالم التمثيل قائلاً: لما ابتديت أمثل سنة 2000 أخدت رأي أبويا في لعب الشخصية فعلمني وقال لي أي حاجة تقولها لازم تلتزم بالصدق، لأنك بتلعب دور مش بتاعك وممكن يكون ضد مبادئك وعقيدتك بس لازم علشان الناس تتفاعل معاك وتحب أفلامك تصدق إنك الشخصية اللي بتلعبها.

وأضاف: أنا لما بحب حاجة بهرب منها لو حسيت إنها هتتملكني خاصة لو كانت مؤذية، وأنا مش بتاع نفسي أنا بتاع الناس، ووالدي فاروق الفيشاوي كان بيقولي أنت مش بتاع نفسك أنت ملك الناس ولازم تقدر وتراعي ده، ومش عايز السينما تتملكني لإني عايز أبقى مخرج وأعمل أفلام حلوة، ولو عندي 80 سنة أقدر أكون مخرج لإني مع العمر ده لو بقيت ممثل محدش ممكن يتصل بيا.

أزمتة مع ناهد فريد شوقي

وعن أزمته مع المنتجة ناهد فريد شوقي قال خلال ظهوره في برنامج ع المسرح، تقديم الإعلامية منى عبدالوهاب: ماتت زعلانة مني، وأنا كمان زعلان منها، بس هنعمل إيه؟ ربنا يرحمها ويسامحها، ومندمتش إنها زعلت مني لإن هي اللي مزعلاني، واذكروا محاسن موتاكم والحي أبقى من الميت.

من ناحية أخرى نافس أحمد الفيشاوي خلال موسم الصيف بفيلمي السيستم وعادل مش عادل، وحقق من خلالهما إيرادات مقبولة.